Чамашкылыг чадырывыс чандаң ыжы
Дилиндектей хээп, чонган чымчак манза
Дистиништир эптеп-тудуп, кадап кылган
Чамашкылыг чадырывыс чандаң ыжы
Сагыжымны артыжаан дег ышталдырды.
Сарыым-биле сүлчээлежип, сүмележип,
Салымывыс бириктирип, амыдыраан
Чаш-ла куштуң уязы дег сававыстың
Сактыышкынын кожамык чок төөгүп берейн.
Чедер-четпес төгериивис ажылдап ап,
Чедиштирип, муңчулуп-ла чордувус чоп.
Чээливис төлээр хүнү чедип кээрге
Серт-бурт кыннып, шыппыраңнап чордувус чоп.
Шыны херек, аравыска сөстер кагжып,
Шыжыгыксап, шугулдажып чордувус чоп.
Шымбай үе ховар турган, миннип чор мен.
Шыгып, ыглаан кызыл карааң сактып чор мен.
Ажылдаары дыка дааштыг соодукчувус
Аккыр будуу сүвүрлү-даа берген болза
Аъшты-чемни изиг хүнге үретпейн,
Амдыгаа дээр сири-кавы атпаңнап чор.
Энир чылын чээп берген майыктаажым
Элей берип, улдуңнары ырзайган-дыр.
Эки өйде, хөреңгивис көвүдезе
Ээжээ бедик, нарын сапык садып бээр мен.
Думаалайлыг, ак-ла тоннуг келин кылдыр,
Душтуум кылып, шайың бузуп чадап каан мен.
Тудуп, айтыр өскүс анай менде чок бол,
Туруш болгаш мөзү-бүдүш - өнчүм-не ол.
Канчап канчаар? Бүгү чүүлдү сактып кээрге
Караам чажы бүлдеңнедир дамдылап чор.
Чамашкылыг чадырывыс чандаң ыжы
Сагыжымны туманналдыр бууктуруп чор.
Буян Сеткил
