Көдээ черге чурттаксаар мен
Хөвең, дүк, чүң дыдып каан дег булуттарлыг
Көдээ черге чурттаксаар мен.
Ыяш херим хөлегезин чаглактанган
Ыттар эзеп, ышкыштап-ла чытканнар дег.
Ыржым, шыпшың кудумчуну довурадыр
Ылчың, тенек бызаалар-ла шаашкактаан дег.
Көдүрүлген кара булут дымыраткан
Көдээ черге чурттаксаар мен.
Херилгештиң, куурарган эрги хевин
Хендир, чептен бир-ле угбай чыгганзыг-даа.
Бичии чаштар терге мунуп, каттыржырга
Бизең дагга чаңгыланып турганзыг-даа.
Көржең ыжы шөйлүп, самнаан чандаңнарлыг
Көдээ черге чурттаксаар мен.
Хоорайның анчыг даажы мында чогул.
Хостуг. Шөлээн. Кулактарга дываажаң-дыр.
Өдексиг чыт, хамык малдың чассыг караа,
Өлең сиген өкпе-чүрээм өөртүр-дүр.
Көгегерип көстүп турар даглар бүргээн
Көдээ черге чурттаксаар мен.
Авыралдыг Тывавыстың сүлде-сүзүү,
Артыш чыды, ачам чыды ында сиңген.
“Кончуг эрлер көдээ черге өзер” дижип,
Хоочуннар кайын чазар, чиге сөглээн.
Көже тараа хооруп, соктап, челбип, тыртар
Көдээ черге чурттаксаар мен.
Көжээлерлиг шынааларда арбын үнген
Көкке тоткан кулунчактар дешкилешкен
Көдээ черниң ишчилери менди чорда
Көшкүн арат тыва болуп артып каар бис.
Буян Сеткил
