Кыстарга чагыым
Амгы шагда бистиң кыстар
Аажок чиктиг апарган-дыр.
Акша-ла дээр, чычаан-на дээр.
"Ам-даа эккел, ам-даа!"-ла дээр.
Эргижиреп, элевээн-даа
Эки хевин далдап кааптар.
Ээжээнде шиштиг идиин
Эргий солааш туруп-ла бээр.
Кара кишти диригге-ле
Кактап-союп, хилинчектээш,
Кежин дараан тонун кеткеш,
Кегженгилеп, каттырар-даа.
Таакпызын чырыктапкаш,
Дашказын "ток" кыла каапкаш,
Дазайтыр кээп ора каапкаш,
Далаш-биле езуургаар-дыр.
Аъш-чем-даа кылып билбес,
Айгы-байгы шайлааракта.
Аал-оран чуп, ширбивес -
"Айфон", алдын, хептер сактыр.
"Эрлер биске херек чок" - деп,
Чыжыр кызыл будуп алган
Эмчигир ол эрнин чадып,
Чылбыга дег шуугаар-дыр.
Акшалыг, бай, эки чорда
"Амыраам" дээш, куспактаныр.
Бергелерге таваржырга
Безин чадаар деткивес-тир.
"Норка" тонун кедип алгаш,
Нояннар дег бардамнаксаар,
Каржы, хоптак, сагыжы бак
Кадайлар ам арбыдаан-дыр.
Каш чылдар эртер болза
Каас-чараш Тывавыска
Хоюг, чымчак, уян кыстар
Ховартаары, чидери ол бе?
Шупту ындыг дивейн-дир мен.
Шулу боду, сагыжы-даа
Чараш кыстар элбек-даа бол,
Чамдыктарын чемеледим.
Тывам кызы, таптыг бодан.
Тывызыксыг сеткилдиг бол.
Ээлдек, эрес аажылыг бооп,
Эчис чаагай амыдыра.
Алган эшке дуза болуп,
Арай чашка ава болуп,
Эриг баарлыг бурган болуп,
Эки чуртта, тывам кызы.
Буян Сеткил.
