Күскү хаттың когурумнуг чыварынга
Күдүжеңнеп, шыырныгып, сири-кавы
Күжүр бодум чуртталганың овуузуннуг
Күзелинге элзедипкен чоруур-дур мен.
Чеңнеримни шөе соккаш, холум чылдып,
Чежемейниң чыргалаңче чүткүүрүмге
Хендирбемниң сөөктерин кызырадыр
Хедер салым аар чүъгүн сөөртүп чор мен.
Ызырар ыт сагындырар улустарның
Чаңчаттынган сөзү ажыг, берге-даа бол,
Ызыгуурум бөдүүн-даа бол, өрү чүткүп,
Чаңгыс, чараш үзелимче шургуп чор мен.
Эргим авам, ачам ийи чораан болза
Эргеледип, чассыдып-даа келир ийик.
Эдегейниң элезинин электен-не
Эгүүр шагда шугланыпкаш, удудулар.
Багай авам, ачам ийи чораан болза
Бажым чыттап, меңээ болчуп келир ийик.
Кудугуйнуң куу доюн шугланыпкаш,
Кударанчыг узун кылдыр удудулар.
Дуза дилеп, кыйгы салган тунук үнүм
Дузакталган куйда ышкаш чаңгыланды.
Көскү-хөрээм човулаңныг ээрежирин
Көрүп, дыңнааш, кым-даа ону тогбайн барды.
Думчуум ажып, боскум доора хая дуглап,
Дуюкаа мен ишкирниге бергилээр мен.
Бижиттинмес, сөглеттинмес буугуушкуннар
Биеэги мээң чазык хөңнүм хөме бээрлер.
Бүлдеңнешкен караам чажын ышкынмас дээш,
Бүдүү, маажым өрү дээрже көргүлээр мен.
Бүзүрертир өйүп каапкан сагыш саргып,
Бүрүлерни шылырадыр сүскүлээр мен.
Чүү-даа чүве бүтпес ышкаш сагындырып,
Чүъктүң аары молдуруумну сыккан ышкаш,
Чаржынчыдыр бүзүрелим оскунзумза
Чаражым-на мени деткип келир чоржук.
Моондактыг хоптуң-чиптиң шуурганында
Моюндуруум көдүрүпкен илгип чор мен.
Келир өйде шаптараазын черле доостур
Кежик-чолдуң хүнү бар деп билип чор мен.
Буян Сеткил.
