Диргелгештиң, дымыраткан ак чаъс ышкаш,
Дириг чорда үүле-херек төнер эвес.
Дискектерниң аяктары ыстагыже
Дистинчипкен бергелерни ажып чор бис.
Шагжаң, шаараш ээгилерлиг хөрек иштин
Шаң-бус тынган изиг ханныг чүрек чылдып,
Шаптараазын-моондактарга удур туржуп,
Шаавыс-биле амыдырап-чурттап чор бис.
Кударанчыг, куурумчу салым багын
Куюм хүлээп, дуюкаа бис буугар бис.
Кургаг черже үндүр октаан балыктар дег
Курлуп-хилеп, өө тынып, дывылаар бис.
Көзенектиг соңгавыстың караанга кээп,
Көзүлбестээн доштуг шилди ажа дырбап,
Көгергилээн даглар ынды бир-ле черже
Көжээлер дег көрүп алган тургулаар бис.
Азыглары хырааларга бызаттырган
Азарганчыг, адыш оюу, ирик, чавыс,
Чудуктардан чууп кылган казанаавыс
Чугайлааны дески эвес, хоорулчак.
Чоорганывыс хөвеңнери чугалаан-дыр.
Чогуур чылыг биске бербес чадавас оң.
Энир чылгы эдээ орук тонувусту
Эккелгештиң, кырывыстан эштип алыыл.
Хөмүр чок бол, шыырныктырар соок-даа бол,
Хөңнүң чазаар ынакшылым өжүп төнмес.
Акша чок бол, аъш-чем аймаа эвээш-даа бол
Арыг шынчы ынакшылым черле төнмес.
Сииреш холум судалдары соп-ла чорза
Силер-биле чарылбас мен, ынакшылым.
Карак чажы кургавайн, агып чорда
Кажанда-даа каашпас бис, ынак сарыым.
Буян Сеткил.
